Melgaço é unha localidade portuguesa pertencente ao Distrito de Viana do Castelao, rexión Norte e sub-rexión do Minho-Lima, con aproximadamente 1.500 habitantes.

É sede dun municipio con 239,04 km2 de área e 9.213 habitantes (segundo censo de 2011), subdividido en 18 freguesías. O municipio está limitado ao norte e leste por Galicia, ao suroeste polo municipio de Arcos de Valdevez e ao oeste por Monção. É ademais o municipio máis setentrional de Portugal.

O clima pode clasificarse como morno atlántico, cun valor medio anual de 14,4ºC. A temperatura media oscila así ao longo do ano entre o máximo de xullo (22,2ºC) e o mínimo de xaneiro (8,81ºC). Giestoso, con 1.335 metros de altitude, na freguesía de Castro Laboreiro, é o punto máis elevado do municipio.

Breve apunte etnográfico

Melgaço esténdese pola marxe esquerda do río Miño ata as serras da Peneda e do Soajo. Poderían delimitarse dúas zonas diferenciadas. A ribeirinha, xunto ao Miño, caracterízase por unha sucesión de pequenos vales e suaves costas, bañados polos afluentes do río fronteirizo, típica en campos cultivados en socalcos e sostidos por muros de pedra onde se atopan os viñedos. Doutra banda, a zona montañosa e planáltica, donde deambulan rabaños de ovinos, caprinos e mandas de gando vacún. Terreos ideais para o centeo, pataca ou cría do porco.

Este contexto determinou que ao longo do tempo a vida das xentes de Melgaço xirase ao redor da agricultura e gandería, desenvolvéndose para ese efecto os utensilios necesarios. Melgaço é xa que logo ademais un concello pleno de tradicións ligadas á artesanía: liño, la, apeiros agrícolas, canastros ou muíños construíron parte da historia da vila.

A calidade das augas termais da área Águas do Peso é longamente recoñecida desde hai anos, polo que a recuperación e revitalización da Estância Termal constitúe unha importancia vital para o desenvolvemento económico do municipio. De vocación fortemente turística, presenta unha oferta de calidade nos seus establecementos de hostalería, onde se pode gozar dunha exquisita gastronomía típica, con produtos locais: cabrito, lamprea, fumeiro e viño Alvarinho.